بمشي على درب له الناس يسعون
واصد عن درب الدجي والعتامة
وبقصر اليسرة عن الضيم والهون
وطلق يميني للصخا والكرامــة
وبحترم نفسي وانا شخص ممنون
ومن يحترم نفسة وجوب احترامه
ماني من اللي في ذرى الحيط يمشون
ولامن اللي معتلي فـي مقامـه
متواضع وأمشي على الحق بالهون
متوسـط المعرفـة والشهامـة
ولي مجلس دايم له الناس يفلون
شعرت بابه والدلال العلامـه
مايفتح الا فيه الاجواد يدنون
ويالله عسى اللي يقرب للسلامه
هذا طريقي وكثر الناس يدرون
صديت عن درب حلاله حرامه
ميزت ربعي بين عاقل ومجنون
واكشف بليد المنفعة من سلامه
واهل المصالح لو على يوم يبنون
في يوم ثاني يرغبون الـهدامه
واهل الحكي لو لك عن الناس يحكون
بيجيك يوم ويقصدك في كلامه
لاصار سيفة لاقرب الناس مسنون
يضرب رفيقة وان اقوى في عضامه
ناس مع الكلمة يروحون ويجون
بس المصيبة يدعـون الفـهامه
ولانيـب ديان ولانيب مديون
ولا بغيت من الهروج الـملامه
ولاطلـبت من المخاليق يبكون
ولا بغيت من الحزين ابتـسامه
بمشي بدربي واترك الناس يمشون
كلن على كيفه رقى كل هـامه
ولا صرت انا من راعي الطيب مطعون
ابيستوي قرب الرفيق وعـدامه
وأن خاب ضني بأقرب الناس وشلون
بعطيك ضني يارفيــق الندامه